پیپلز پارٹی کو انتخابات میں لیول پلیئنگ فیلڈ نہیں دی گئی: وزیراعظم آزاد کشمیر

وزیراعظم آزاد کشمیر فیصل ممتاز راٹھور نے الزام عائد کیا ہے کہ حالیہ انتخابی عمل کے دوران پاکستان پیپلز پارٹی کو لیول پلیئنگ فیلڈ فراہم نہیں کی گئی اور مسلم لیگ (ن) کو کامیاب کرانے کے لیے متعدد حلقوں کے نتائج میں تبدیلی کی گئی۔ اسلام آباد میں آل کشمیر نیوز پیپرز سوسائٹی کے وفد سے گفتگو کرتے ہوئے انہوں نے کہا کہ نکیال، سہنسہ، مظفرآباد اور دیگر علاقوں میں جہاں پیپلز پارٹی فتح یاب ہوئی تھی، وہاں نتائج کا رخ موڑ دیا گیا۔ فیصل ممتاز راٹھور نے واضح کیا کہ آزاد کشمیر کے موجودہ بحران اور جوائنٹ عوامی ایکشن کمیٹی سے درپیش چیلنجز سے نمٹنے کا واحد حل مذاکرات اور بلاول بھٹو زرداری کی تجویز کے مطابق ‘سچ کمیشن’ کا قیام ہے۔ انہوں نے مزید کہا کہ انتخابی بے ضابطگیوں کی شکایات پر قانونی و آئینی فورمز سے رجوع کیا جا سکتا ہے، جبکہ ان کی حکومت نے مشکل حالات کے باوجود صحت، تعلیم اور انفراسٹرکچر کے شعبوں میں ریکارڈ اصلاحات کی ہیں۔