جماعت اسلامی کا 12 ربیع الاول کے بعد ملک گیر ہڑتال کا اعلان

امیر جماعت اسلامی پاکستان حافظ نعیم الرحمن نے پٹرولیم لیوی اور مہنگائی کے خلاف 12 ربیع الأول کے بعد ملک گیر شٹر ڈاؤن ہڑتال کرنے کا باقاعدہ اعلان کر دیا ہے۔ لاہور میں پریس کانفرنس کرتے ہوئے انہوں نے واضح کیا کہ گورنر ہاؤسز کے باہر جاری دھرنے مطالبات کی عملی منظوری تک ختم نہیں ہوں گے اور ضرورت پڑنے پر اسلام آباد کی جانب مارچ بھی کیا جائے گا۔ حافظ نعیم الرحمن نے حکومت سے پٹرولیم مصنوعات کی قیمتوں اور لیوی میں فوری کمی کا مطالبہ کرتے ہوئے آٹا و چینی مافیا، کسانوں کو کھاد کی عدم فراہمی اور سرکاری افسران کے شاہانہ اخراجات پر شدید تنقید کی۔ انہوں نے عوامی حقوق کی اس جدوجہد میں شہریوں سے بھرپور شرکت کی اپیل کی ہے۔