نائیجیریا میں مسلح افراد کے متعدد دیہات پر حملے، 40 افراد ہلاک، 100 سے زائد اغوا

نائیجیریا کی وسطی ریاست نائجر کے بورگو علاقے میں مسلح افراد نے کئی دیہات پر ہولناک حملے کر کے 40 سے زائد افراد کو ہلاک اور 100 سے زائد کو اغوا کر لیا ہے۔ پولیس کے مطابق فوجی طرز کے لباس میں ملبوس مسلح ڈاکوؤں نے نماز کے بعد ڈیکارا، گیدان زانا، سابون گیدا اور ماساکا کے دیہات کو نشانہ بنایا اور مقامی رہائشیوں کو یرغمال بنا کر قریبی جنگلات کی جانب لے گئے۔ مقامی حکام اور رکنِ اسمبلی کے مطابق دور دراز اور سرحدی علاقوں میں کمزور سکیورٹی کا فائدہ اٹھاتے ہوئے جرائم پیشہ گروہ اغوا برائے تاوان اور لوٹ مار کی کارروائیاں کر رہے ہیں۔ یہ ہولناک واقعہ ایک ایسے وقت میں پیش آیا ہے جب نائیجیرین سکیورٹی فورسز نے حال ہی میں ایک بڑے آپریشن کے دوران اسی خطے سے 300 سے زائد مغویوں کو بازیاب کرانے کا دعویٰ کیا تھا۔