بلاول بھٹو کا آزاد کشمیر میں بارشوں سے جانی و مالی نقصان پر اظہار افسوس

پاکستان پیپلز پارٹی کے چیئرمین بلاول بھٹو زرداری نے آزاد جموں و کشمیر میں موسلا دھار بارشوں کے باعث ہونے والے قیمتی جانی و مالی نقصان پر گہرے دکھ اور افسوس کا اظہار کیا ہے۔ متاثرہ خاندانوں سے دلی تعزیت کا اظہار کرتے ہوئے انہوں نے انتظامیہ سے مطالبہ کیا کہ متاثرین کو فوری امداد، ریسکیو، عارضی رہائش اور طبی سہولیات کی فراہمی بلا تاخیر یقینی بنائی جائے۔ بلاول بھٹو زرداری نے مزید شدید بارشوں کی پیشگوئی کے پیشِ نظر ہنگامی تیاریوں کو مزید مؤثر بنانے کی ہدایت کی اور پیپلز پارٹی کے رہنماؤں و کارکنوں کو ہدایت جاری کی کہ وہ متاثرہ علاقوں میں امدادی کارروائیوں میں بڑھ چڑھ کر حصہ لیں اور متاثرین کو ہر ممکن معاونت فراہم کریں۔