بیلجیئم میں گاڑیاں بیچنے والا نوجوان ڈی این اے ٹیسٹ کے بعد شہزادہ قرار

بیلجیئم میں 26 سالہ سابق کار سیلز مین کلیمنٹ وینڈن کرک ہوو ڈی این اے ٹیسٹ کے ذریعے نسبت ثابت ہونے کے بعد باقاعدہ طور پر شاہی خاندان کا حصہ بن گئے ہیں۔ بیلجیئم کے بادشاہ فلپ کے چھوٹے بھائی، شہزادہ لورینٹ نے انہیں قانونی طور پر اپنا بیٹا اور وارث تسلیم کر لیا ہے۔ ذرائع کے مطابق 1990ء کی دہائی میں کلیمنٹ کی والدہ اور شہزادہ لورینٹ کے درمیان قائم ہونے والے تعلقات کے نتیجے میں ان کی پیدائش ہوئی تھی۔ اگرچہ کلیمنٹ کو قانونی طور پر شہزادے کا درجہ دے دیا گیا ہے، تاہم انہیں شاہی وظیفہ یا سرکاری ذمہ داریاں نہیں دی جائیں گی، البتہ وہ اپنے والد کی نجی جائیداد میں دیگر بہن بھائیوں کے ہمراہ برابر کے وراثتی حقوق کے حقدار ہوں گے۔