رونالڈو کی ’بسم اللّٰہ‘ پڑھنے کی ویڈیو توجہ کا مرکز بن گئی

پرتگال سے تعلق رکھنے والے عالمی شہرت یافتہ اسٹار فٹبالر کرسٹیانو رونالڈو کی ایک تازہ ترین ویڈیو سوشل میڈیا پر شدید توجہ کا مرکز بنی ہوئی ہے، جس میں انہیں ایک اہم میچ کے دوران پنالٹی کک لینے سے قبل مبینہ طور پر ‘بِسمِ اللّٰہِ الرَّحْمٰنِ الرَّحِیْمِ’ پڑھتے ہوئے دیکھا جا سکتا ہے۔

سوشل میڈیا پر دنیا بھر میں سب سے زیادہ فالو کی جانے والی شخصیات میں شمار ہونے والے رونالڈو گزشتہ چند برسوں سے سعودی عرب کے معروف فٹبال کلب ‘النصر’ کی نمائندگی کر رہے ہیں۔ اس دوران ان کے بارے میں یہ دعوے بھی سامنے آتے رہے ہیں کہ انہوں نے اپنے مسلم ساتھی کھلاڑیوں اور عرب ثقافت کے گہرے اثرات قبول کیے ہیں۔

حالیہ میچ کے دوران رونالڈو سے منسوب اس لمحے کی ویڈیو سامنے آتے ہی سوشل میڈیا پر تیزی سے وائرل ہو گئی، جس نے ان کے کروڑوں مسلم مداحوں کو خوش اور جذباتی کر دیا۔ انٹرنیٹ صارفین کی جانب سے اس عمل کو بڑے پیمانے پر شیئر اور سراہا جا رہا ہے۔

ویڈیو پر تبصرہ کرتے ہوئے ایک صارف نے لکھا کہ “یہ بسم اللہ کی طاقت ہے”، جبکہ ایک اور مداح نے جذباتی انداز میں لکھا کہ “یہ منظر دیکھ کر میری آنکھوں میں آنسو آ گئے”۔ ایک اور تبصرے میں کہا گیا کہ “رونالڈو نے ایک بار پھر سب کے دل جیت لیے ہیں”۔ واضح رہے کہ کرسٹیانو رونالڈو اس وقت فٹبال کی دنیا کے سب سے بڑے ایونٹ میں اپنی ٹیم کی نمائندگی کر رہے ہیں، جسے ان کا آخری فیفا ورلڈ کپ بھی قرار دیا جا رہا ہے، تاہم انہوں نے تاحال باضابطہ طور پر فٹبال سے ریٹائرمنٹ کا کوئی اعلان نہیں کیا ہے۔