مشہور کمپنی کا اسٹریمنگ پلیٹ فارم سے 551 فلمیں ہٹانے کا اعلان

مشہورِ زمانہ ٹیکنالوجی کمپنی سونی (Sony) کے اسٹریمنگ پلیٹ فارم کی جانب سے صارفین کی پہلے سے خریدی ہوئی فلموں کو مستقل طور پر ڈیلیٹ کرنے کے اعلان نے دنیا بھر کے صارفین میں غصے اور تشویش کی لہر دوڑا دی ہے۔ سونی کے اس فیصلے کے بعد ڈیجیٹل مالکانہ حقوق پر نئی بحث چھڑ گئی ہے۔

سونی کی جانب سے جاری کردہ باقاعدہ نوٹس کے مطابق، یکم ستمبر سے پلے اسٹیشن (PlayStation) کے صارفین کی رسائی ان کی اپنی خریدی ہوئی 551 مقبول فلموں تک ہمیشہ کے لیے ختم ہو جائے گی۔ کمپنی نے وضاحت کی ہے کہ برطانیہ میں جن صارفین نے ‘اسٹوڈیو کینال’ (StudioCanal) کی فلمیں خرید رکھی تھیں، وہ لائسنسنگ معاہدوں کی مدت ختم ہونے کے باعث اب انہیں مزید اسٹریم نہیں کر سکیں گے، اور یہ فلمیں خودکار طریقے سے ان کی پرسنل ویڈیو لائبریری سے بھی حذف کر دی جائیں گی۔

سونی کے اس فیصلے سے متاثر ہونے والی فلموں میں ہالی ووڈ کی بلاک بسٹر ‘پیڈنگٹن سیریز’، ‘ٹرمینیٹر 2’، ‘اپوکلیپس ناؤ’ اور ‘پینز لیبرنتھ’ سمیت سینکڑوں معروف فلمیں شامل ہیں۔ سونی کے اس نوٹس پر صارفین نے سوشل میڈیا پر شدید برہمی کا اظہار کرتے ہوئے سوال اٹھایا ہے کہ جب انہوں نے ان فلموں کے لیے باقاعدہ رقم ادا کر کے انہیں ‘خرید’ رکھا تھا، تو کمپنی لائسنس ختم ہونے کا جواز بنا کر انہیں لائبریری سے کیسے ہٹا سکتی ہے۔ متعدد صارفین نے اسے ڈیجیٹل خریداری کے نام پر دھوکہ دہی قرار دیا ہے۔