چوری کی انوکھی واردات، 13 کلومیٹر طویل ہائی ٹینشن بجلی کی تاریں غائب

بھارتی ریاست بہار میں چوری کی ایک انتہائی انوکھی اور حیران کن واردات سامنے آئی ہے، جہاں نامعلوم چور 13 کلومیٹر طویل 11 کلو وولٹ (11KV) کی ہائی ٹینشن بجلی کی تاریں کاٹ کر فرار ہو گئے۔ یہ عجیب و غریب واقعہ ضلع مغربی چمپارن میں پیش آیا، جس کے بعد محکمہ بجلی کی درخواست پر پولیس نے نامعلوم ملزمان کے خلاف مقدمہ درج کر لیا ہے۔

تاریں غائب ہونے کی وجہ سے علاقے کے کھیتوں اور فصلوں کو پانی کی فراہمی شدید متاثر ہوئی ہے جس سے کسان سخت پریشان ہیں۔ مقامی دیہاتیوں اور رام پوروا مہانوا پنچایت کے سربراہ نے اس معاملے پر محکمہ بجلی کو کڑی تنقید کا نشانہ بناتے ہوئے کہا ہے کہ یہ چوری ایک دن میں نہیں بلکہ ایک ماہ کے دوران آہستہ آہستہ کی گئی ہے۔ اگر محکمہ باقاعدگی سے لائنوں کی نگرانی کرتا تو اتنی بڑی واردات کبھی ممکن نہ ہوتی۔

پنچایت سربراہ کے بیٹے اپیندر کمار نے متعلقہ جونیئر انجینئر اور دیگر حکام پر ملامت کرتے ہوئے الزام لگایا کہ تقریباً 88 کھمبوں سے تاریں غائب کی گئیں، جس کی کئی بار شکایت کی گئی مگر حکام نے اسے سنجیدگی سے نہیں لیا۔ انہوں نے شک ظاہر کیا کہ اس میگا چوری میں محکمے کے اپنے افسران اور عملہ ملوث ہو سکتا ہے، اسی لیے پولیس کو بہت تاخیر سے مطلع کر کے معاملے کو دبانے کی کوشش کی گئی۔ دوسری جانب پولیس کا کہنا ہے کہ مقدمہ درج کر کے تحقیقات کا آغاز کر دیا گیا ہے اور جلد ہی واضح ہو جائے گا کہ اس کے پیچھے کوئی بڑا گینگ ہے یا محکمے کی ملی بھگت شامل ہے۔