نادرا نے شناختی نظام میں اہم ریگولیٹری اصلاحات متعارف کرا دیں

نادرا کے ترجمان کے مطابق یہ اصلاحات نادرا اتھارٹی بورڈ کی منظوری کے بعد گزٹ آف پاکستان میں شائع کی گئیں۔

نادرا اتھارٹی بورڈ کی منظوری کے بعد ریگولیشنز میں شناختی دستاویزات کی تصدیق کے لیے ریکارڈ کے جائزے کا باقاعدہ طریقہ کار شامل کیا گیا ہے، تحقیقات، سماعت اور حتمی فیصلوں کے لیے خصوصی ویریفکیشن بورڈز قائم کر دیے گئے ہیں۔شناختی کارڈ کے ضوابط میں اہم اصطلاحات کی مزید وضاحت بھی شامل ہے، اسی طرح متروک یا وصول نہ کیے گئے شناختی کارڈز کی تلفی کا طریقہ کار بھی واضح کر دیا گیا ہے،ایک سے زیادہ شناختی کارڈز سے متعلق معاملات نمٹانے کا نیا اور شفاف طریقہ متعارف کرایا گیا ہے۔یتیم خانوں اور تحفظِ اطفال کے اداروں کی رجسٹریشن کے لیے قواعد بھی ریگولیشنز کا حصہ ہیں، پاکستان اوریجن کارڈ کے لیے اہلیت کا معیار واضح کر دیا گیا ہے جب کہ سلسلہ نسب کی تصدیق کے لیے مطلوبہ دستاویزات اور کارڈ ہولڈر کے حقوق بھی شامل کیے گئے ہیں۔دوسری جانب ترجمان کا مزید کہنا تھا کہ خریداری کے شفاف نظام کے لیے نادرا پروکیورمنٹ ریگولیشنز کی منظوری بھی دے دی گئی ہے، یہ منظوری ادارے کو جدید بنانے کی جانب ایک اہم قدم ہے