رندیپ ہُدا نے سلمان خان کے مشورے پرعمل نہ کرنے کی وجہ بتادی

ورسٹائل بالی ووڈ اداکار رندیپ ہُدا نے انکشاف کیا ہے کہ ہندی سنیما کے سپر اسٹار سلمان خان نے انہیں کیریئر کے آغاز میں ایک اہم مشورہ دیا تھا، تاہم انہوں نے اس پر عمل نہیں کیا کیونکہ وہ اپنے پورے کیریئر میں خود کو ایک جیسے کرداروں تک محدود نہیں رکھنا چاہتے تھے۔

اپنے ایک حالیہ انٹرویو میں رندیپ ہُدا نے بتایا کہ سلمان خان نے ان کے والد کے ساتھ مل کر انہیں ایسے کرداروں پر توجہ مرکوز کرنے کی ترغیب دی تھی جو انہیں اسکرین پر بطور روایتی ہیرو پیش کریں اور ان کا ایک مستقل امیج برقرار رکھنے میں مددگار ثابت ہوں۔ سلمان خان کا بنیادی مشورہ یہ تھا کہ میں ایسے کرداروں کا انتخاب نہ کروں جہاں میں ہیروئک نظر نہ آؤں۔

رندیپ ہُدا نے سلمان خان کے اس مشورے کو سراہتے ہوئے کہا کہ یہ یقیناً ایک اچھی نصیحت تھی اور میرے والد کا بھی یہی مؤقف تھا کہ آپ کو اسکرین پر ایک جیسا نظر آنا چاہیے اور اسی قسم کے کردار کرنے چاہئیں جس سے ایک خاص امیج بنتا ہے اور اسٹار بننے میں مدد ملتی ہے۔ تاہم، رندیپ کا کہنا تھا کہ مختلف اور چیلنجنگ کرداروں کو تلاش کرنے کے ان کے ذاتی شوق نے انہیں اس فارمولے پر عمل کرنے سے روکا۔

اداکار نے واضح الفاظ میں کہا کہ ایک ہی نوعیت کے کردار کو بار بار ادا کرنا انہیں انتہائی بورنگ لگتا ہے۔ انہوں نے وضاحت کی کہ “میں نے اس مشورے پر عمل اس لیے نہیں کیا کیونکہ میں نے ہمیشہ یہ محسوس کیا ہے کہ ایک ہی چیز کو بار بار دہرانا اکتا دینے والا کام ہے، اور یہ وہ چیز ہے جو میں اپنے کیریئر میں کبھی نہیں کرنا چاہتا تھا۔” رندیپ ہُدا کا مزید کہنا تھا کہ اگرچہ انڈسٹری میں اسٹار بننے کے لیے اس روایتی نقطہ نظر کو اپنانے میں کوئی حرج نہیں ہے، لیکن یہ ان کے مزاج اور کیریئر کے مقاصد سے میل نہیں کھاتا تھا، اور چونکہ مستقبل کا کسی کو معلوم نہیں ہوتا، اس لیے انہوں نے ہمیشہ ورسٹیلٹی کو ترجیح دی۔