دشت واقعہ انتہائی دل دہلا دینے والا ہے، معصوم لوگوں کو شہید کرنے والوں کے خلاف قومی بیانیہ بنایا جائے: وزیر اعلیٰ بلوچستان سرفراز بگٹی کی کراچی میں میڈیا سے گفتگو

وزیر اعلیٰ بلوچستان میر سرفراز بگٹی اور گورنر نہال ہاشمی نے کراچی میں دشت (بلوچستان) کے واقعے میں شہید ہونے والے تاجر علی مرتضیٰ جمیل کی رہائش گاہ کا دورہ کیا اور مرحوم کے اہلِ خانہ سے دلی تعزیت اور ہمدردی کا اظہار کیا۔ اس موقع پر میڈیا سے گفتگو کرتے ہوئے وزیر اعلیٰ سرفراز بگٹی نے شہید تاجر کی بچیوں کی کفالت کی ذمہ داری بلوچستان حکومت کی طرف سے اٹھانے کا اعلان کیا اور اہلِ خانہ کو ہر ممکن تعاون کی یقین دہانی کرائی۔

وزیر اعلیٰ سرفراز بگٹی کا کہنا تھا کہ علی مرتضیٰ جمیل کا قتل انتہائی افسوسناک اور دل دہلا دینے والا واقعہ ہے، جس کی جتنی بھی مذمت کی جائے کم ہے۔ انہوں نے انکشاف کیا کہ دشت میں سیکیورٹی فورسز نے گزشتہ روز ہی ایک انٹیلیجنس بیسڈ آپریشن (IBO) کیا ہے جس میں تین دہشت گردوں کو جہنم واصل کیا جا چکا ہے۔ انہوں نے واضح کیا کہ سوشل میڈیا پر اس واقعے کو غلط رنگ دے کر پروپیگنڈا کیا جا رہا ہے، تاثر اور حقیقت میں فرق رکھنا ضروری ہے۔ دہشت گرد تنظیمیں اپنی ناکامی اور سبکی مٹانے کے لیے معصوم شہریوں کو نشانہ بنا رہی ہیں۔

انہوں نے مزید کہا کہ “میں خود اس وقت آواران سے آ رہا ہوں، بلوچستان کا ایک انچ بھی ایسا نہیں ہے جہاں ہم یا حکومت کی رِٹ نہ جا سکے۔ ہزاروں کلومیٹر طویل ہائی ویز سے روزانہ مسافر بحفاظت گزرتے ہیں، لیکن جب دشمن چھپا ہوا ہو تو چیلنجز بڑھ جاتے ہیں۔” وزیر اعلیٰ نے زور دیا کہ بیانیے کے ذریعے تشدد کو بڑھاوا دینے کے بجائے، معصوم لوگوں کو نشانہ بنانے والے ان گمراہ عناصر کے خلاف ایک مضبوط قومی بیانیہ بنانے کی ضرورت ہے۔ انہوں نے بتایا کہ واقعے کی تحقیقات کے لیے اسپیشل انویسٹی گیشن ٹیم (SIT) تشکیل دے دی گئی ہے جو کام کر رہی ہے۔ بلوچستان میں حالات برسوں سے خراب ہیں، لیکن عوام کے جان و مال کا تحفظ ہماری اولین ذمہ داری ہے اور ہمیں اس کا پورا احساس ہے۔