قومی تعلیمی ایمرجنسی کے دو سال بعد بھی ملک میں اڑھائی کروڑ بچے سکول سے باہر

وفاقی حکومت کی جانب سے ملک میں قومی تعلیمی ایمرجنسی کے اعلان کو دو سال سے زائد کا عرصہ گزرنے کے باوجود اڑھائی کروڑ سے زائد بچوں کو اسکولوں میں لانے کی مہم بری طرح ناکام ثابت ہو رہی ہے۔ یہ انکشاف سول سروسز اکیڈمی کی جانب سے تیار کی گئی ایک جامع تقابلی پالیسی جائزہ رپورٹ میں کیا گیا ہے۔

رپورٹ کے مطابق، پاکستان ایڈمنسٹریٹو سروس کیمپس میں قائم پانچ پالیسی اینالیسز گروپس نے چاروں صوبوں اور وفاقی اکائیوں کی تعلیمی پالیسیوں کا تفصیلی جائزہ لیا۔ رپورٹ میں واضح کیا گیا ہے کہ تعلیمی بحران وقتی نہیں بلکہ کئی دہائیوں پر محیط ہے، جس کی بنیادی وجوہات میں ناکافی فنڈنگ، غیر مربوط انتظامی نظام، مسلسل مالی کمزوری اور ناقص طرزِ حکمرانی شامل ہیں۔ تمام صوبوں نے قومی تعلیمی ایکشن پلان (NEAP) 2026 کے تحت تعلیمی روڈ میپ تو بنائے، مگر اصل مسئلہ پالیسیوں پر مؤثر عملدرآمد کا ہے۔

پاکستان انسٹی ٹیوٹ آف ایجوکیشن (PIE) کے اعدادوشمار کا حوالہ دیتے ہوئے رپورٹ میں بتایا گیا ہے کہ پاکستان میں اس وقت اسکول سے باہر بچوں کی تعداد 2 کروڑ 51 لاکھ سے 2 کروڑ 60 لاکھ کے درمیان ہے۔ آئین کے آرٹیکل 25-اے کے تحت مفت اور لازمی تعلیم کی آئینی ضمانت کے باوجود پاکستان دنیا میں تعلیمی محرومی کا دوسرا بڑا بوجھ اٹھانے والا ملک بن چکا ہے۔

اکیڈمی رپورٹ کے مطابق، 8 مئی 2024 کو لگائی جانے والی تعلیمی ایمرجنسی محض سیاسی توجہ کا مرکز بنی، کیونکہ ہر صوبے کے مسائل الگ ہیں جنہیں یکساں قومی حکمتِ عملی سے حل نہیں کیا جا سکتا۔

ملک کا سب سے بڑا تعلیمی بوجھ اٹھا رہا ہے، جہاں 96 لاکھ سے 1 کروڑ 4 لاکھ بچے اسکولوں سے باہر ہیں۔ پنجاب اسکول ایجوکیشن ڈیپارٹمنٹ کی 2026 کی رپورٹ کے مطابق، 64 لاکھ بچوں نے کبھی اسکول کا منہ نہیں دیکھا جبکہ 31 لاکھ سے زائد بچے تعلیم ادھوری چھوڑ چکے ہیں۔

رپورٹ کے مطابق، 1990 سے 2010 کی دہائی تک آبادی جس رفتار سے بڑھی، سرکاری تعلیمی انفراسٹرکچر اس کا ساتھ دینے میں ناکام رہا، جس کی وجہ سے نجی اسکولوں کا دائرہ تو بڑھا لیکن غریب اور پسماندہ طبقات کے بچے تعلیم کے بنیادی حق سے مستقل محروم ہو گئے۔