ایران اور قطری حکام کی دوحہ میں بیٹھک، بحری تجارت بحال کرنے کا اعلان

ایران اور قطر کے حکام کے درمیان دوحہ میں ہونے والے کامیاب مذاکرات کے بعد دونوں ممالک کے درمیان معطل بحری تجارت 5 ماہ بعد باقاعدہ طور پر بحال ہو گئی ہے۔

ایرانی حکام کے مطابق، اس اہم پیش رفت کے بعد ایران کی ‘دیر بندرگاہ’ اور قطر کی ‘الرویس بندرگاہ’ کے درمیان تجارتی جہازوں اور کشتیوں کی آمدورفت کا سلسلہ دوبارہ شروع ہو گیا ہے۔ قطر نے ہر قسم کے بحری جہازوں کے لیے سمندری آمدورفت اور تجارتی سرگرمیوں کی اجازت دے دی ہے۔ قطر کی وزارتِ ٹرانسپورٹ نے تمام بحری آپریٹرز کو ہدایت جاری کی ہے کہ وہ سفر کے دوران نافذ العمل بحری ضوابط، قوانین اور حفاظتی ہدایات کی مکمل پابندی کو یقینی بنائیں۔

واضح رہے کہ دونوں ممالک کے درمیان بحری راستوں کی یہ بحالی ایک ایسے وقت میں سامنے آئی ہے جب ایک دن قبل ہی خطے میں ہونے والی فوجی کارروائیوں کے دوران ایک قطری شہری کی موت کا باقاعدہ اعلان کیا گیا تھا، جس کے بعد پیدا ہونے والی کشیدگی کے باوجود دونوں ممالک نے تجارتی روابط کو ترجیح دی۔