امریکہ ہی اسرائیل کا واحد طاقتور اتحادی نہیں، ’ایک چھوٹا سا ملک انڈیا‘ بھی ہے: نیتن یاہو

اسرائیلی وزیراعظم بنیامین نیتن یاہو نے امریکی نائب صدر جے ڈی وینس کے اس بیان کی کھلی تردید کر دی ہے جس میں انہوں نے امریکہ کو اسرائیل کا واحد اور سب سے طاقتور اتحادی قرار دیا تھا۔ نیتن یاہو کا کہنا ہے کہ اسرائیل کے دیگر ممالک کے ساتھ بھی مضبوط تزویراتی تعلقات ہیں۔

واضح رہے کہ امریکہ اور ایران کے درمیان ایک مفاہمتی یادداشت پر دستخط ہونے کے بعد بعض اسرائیلی وزراء نے امریکی انتظامیہ پر شدید تنقید کی تھی۔ اس تنقید کا جواب دیتے ہوئے امریکی نائب صدر جے ڈی وینس نے اسرائیلی کابینہ کو یاد دلایا تھا کہ پچھلے تین ماہ کے دوران اسرائیل کا دفاع کرنے والے دو تہائی ہتھیار امریکی تھے، جو امریکی ہنرمندوں نے بنائے اور جن کے لیے فنڈز امریکی ٹیکس دہندگان نے دیے۔ انہوں نے کہا تھا کہ اگر وہ اسرائیلی کابینہ میں ہوتے تو اپنے واحد اور طاقتور اتحادی (امریکہ) کو نشانہ نہ بناتے۔

 امریکی ٹیلی وژن چینل ‘فاکس نیوز’ کو دیے گئے ایک حالیہ انٹرویو میں جب نیتن یاہو سے امریکی نائب صدر کے اس بیان پر ان کا ردعمل پوچھا گیا، تو انہوں نے کہا، “پہلی بات یہ ہے کہ میں جے ڈی وینس کی عزت کرتا ہوں اور ہمارے تعلقات بہت اچھے ہیں، لیکن اس کا یہ مطلب ہرگز نہیں کہ میں ان کی ہر بات سے اتفاق کروں۔”

اسرائیلی وزیراعظم نے امریکی تسلط کے تاثر کو مسترد کرتے ہوئے مزید کہا، “مجھے اس بات کی نشاندہی کرنا ہو گی کہ ڈونلڈ ٹرمپ وائٹ ہاؤس میں ہمارے عظیم دوست ہیں اور میں اپنے اس مؤقف پر قائم ہوں، لیکن دنیا میں ہمارے دیگر دوست بھی موجود ہیں۔ مثال کے طور پر ایک ملک ہے جو انڈیا کہلاتا ہے، جس کی آبادی 1.4 ارب ہے۔” نیتن یاہو نے دعویٰ کیا کہ انڈیا (بھارت) کے اندر اسرائیل کو بہت بڑے پیمانے پر عوامی اور حکومتی حمایت حاصل ہے، اس لیے امریکہ کو یہ گمان نہیں ہونا چاہیے کہ وہی اسرائیل کا واحد سہارا ہے