لبنان کے اکثریتی مسیحی قصبے رمیش کے میئر نے نیتن یاہو کا دعویٰ مسترد کردیا

لبنان کے ضلع بنت جبیل میں واقع اکثریتی مسیحی قصبے ‘رمیش’ کے میئر حنا الامیل نے اسرائیلی وزیراعظم بنیامین نیتن یاہو کے اس دعوے کو سختی سے مسترد کر دیا ہے جس میں انہوں نے کہا تھا کہ جنوبی لبنان کے بعض مسیحی دیہات نے حزب اللہ سے تحفظ کے لیے اسرائیل کے ساتھ الحاق کی درخواست کی ہے۔

لبنانی سرکاری خبر رساں ادارے ‘این این اے’ کے مطابق، میئر حنا الامیل نے اسرائیلی وزیراعظم کے بیان کو مکمل طور پر بے بنیاد، جھوٹا اور حقیقت کے برعکس قرار دیا۔ انہوں نے واشگاف الفاظ میں کہا کہ جنوبی لبنان کے کسی بھی قصبے، دیہات یا گاؤں نے اسرائیل سے ایسی کوئی درخواست نہیں کی اور نہ ہی یہاں کے لوگ ایسا سوچ سکتے ہیں، اس نوعیت کی بات کا تصور بھی یکسر ناقابلِ قبول ہے۔

میئر کا مزید کہنا تھا کہ جنوبی لبنان کے یہ تمام قصبے لبنان کا دھڑکتا ہوا دل ہیں، جو ملکی حب الوطنی، اپنی مٹی سے مخلصانہ وابستگی اور خالص لبنانی شناخت کی علامت ہیں۔ یہاں کے باسی اپنی سرزمین اور ملک کے دفاع کے لیے متحد ہیں۔