لبنانی مسیحی دیہات نے حزب اللہ سے تحفظ کیلئے اسرائیل سے الحاق کا اظہار کیا: نیتن یاہو کا دعویٰ

اسرائیلی وزیراعظم بینجمن نیتن یاہو نے ایک نیا اور حیران کن دعویٰ کیا ہے کہ جنوبی لبنان کے بعض مسیحی دیہات نے حزب اللہ سے تحفظ حاصل کرنے کے لیے اسرائیل کے ساتھ الحاق (شامل ہونے) کی خواہش ظاہر کی ہے۔

اسرائیلی وزیراعظم کی جانب سے یہ دعویٰ ایک ایسے نازک وقت پر سامنے آیا ہے جب اسرائیل جنوبی لبنان میں فضائی حملوں کی شدید مہم اور زمینی کارروائیاں مسلسل جاری رکھے ہوئے ہے، جبکہ اسرائیلی فوج لبنان کے متعدد سرحدی اور اندرونی حصوں پر باقاعدہ قبضہ بھی کیے ہوئے ہے۔

سیاسی و علاقائی صورتحال پر نظر رکھنے والے ماہرین نیتن یاہو کے اس بیان کو قبضے کے جواز اور لبنانی معاشرے میں مذہبی بنیادوں پر تقسیم پیدا کرنے کی کوشش قرار دے رہے ہیں۔

 دوسری جانب جنوبی لبنان اور دیگر علاقوں پر اسرائیلی جارحیت کے نتیجے میں بڑے پیمانے پر جانی نقصان ہوا ہے۔ لبنان کی وزارتِ صحت کے مطابق، 2 مارچ سے لڑائی دوبارہ شروع ہونے کے بعد سے اب تک اسرائیلی حملوں کے باعث ملک بھر میں کم از کم 4,303 افراد جاں بحق ہو چکے ہیں، جبکہ زخمیوں اور بے گھر ہونے والے شہریوں کی تعداد اس کے علاوہ ہے۔