خواتین کو کیسے لڑکے متوجہ کرتے ہیں، نمرہ شاہد نے بتا دیا

پاکستانی ڈرامہ انڈسٹری کی ابھرتی ہوئی معروف اداکارہ نمرہ شاہد نے حال ہی میں ایک ڈیجیٹل یوٹیوب شو میں بطور مہمان شرکت کی، جہاں انہوں نے شوبز انڈسٹری، صفِ اول کے اداکاروں اور پاکستانی ڈراموں میں مردانہ کرداروں کی پیشکش کے حوالے سے کھل کر اپنے خیالات کا اظہار کیا۔

دورانِ گفتگو جب میزبان نے ان سے سوال پوچھا کہ “ڈراموں میں عام طور پر دکھائے جانے والے جارحانہ اور غصیلا (Aggressive) مزاج لڑکے خواتین کو کیوں متوجہ کرتے ہیں؟” تو نمرہ شاہد نے اس سوچ کو رد کرتے ہوئے ایک مختلف زاویہ پیش کیا۔

نمرہ شاہد کا کہنا تھا کہ حقیقت میں خواتین کو حقیقی زندگی کے جارحانہ مرد نہیں، بلکہ سکرین پر نظر آنے والے بلال عباس خان اور دانش تیمور جیسے دلکش اداکار اور ان کے نبھائے گئے منفرد کردار متوجہ کرتے ہیں۔ انہوں نے اس کی نفسیاتی اور تکنیکی وجوہات بتاتے ہوئے درج ذیل نکات پر روشنی ڈالی: پاکستان میں ڈراموں کے دوران مردانہ کرداروں کو بہت زیادہ گلیمرائز کیا جاتا ہے۔ جب ایک خوبصورت لڑکے کو اسکرین پر لایا جاتا ہے، تو کیمرہ اس کی بڑی آنکھوں، تاثرات اور لباس کو خاص لائٹنگ کے ساتھ نمایاں کرتا ہے۔جب ایسے کرداروں کی انٹری ہوتی ہے اور پسِ منظر میں زبردست رومانوی موسیقی چلائی جاتی ہے، تو لڑکیاں اس سحر سے فوراً متاثر ہو جاتی ہیں۔ سکرین پر جب یہ دکھایا جاتا ہے کہ ایک خوبصورت اور امیر لڑکا ہیروئن کی محبت میں دیوانہ ہے اور اسے بے پناہ اہمیت دے رہا ہے، تو دیکھنے والی شائقین خواتین اسے ہی اپنا “مثالی مرد” (Ideal Man) تصور کرنے لگتی ہیں۔

اداکارہ نے انڈسٹری کے معروف ہیروز کی تعریف کرتے ہوئے کہا کہ دانش تیمور اور بلال عباس جب بھی اسکرین پر آتے ہیں، لوگ انہیں بے حد پسند کرتے ہیں۔ انہوں نے مزید کہا کہ ہمارے پاکستانی ناظرین ابھی روایتی ڈراموں سے خوش ہیں اور شاید وہ ابھی بین الاقوامی اسٹریمنگ پلیٹ فارمز (جیسے نیٹ فلکس) طرز کے بالکل حقیقت پسندانہ مواد کے لیے پوری طرح تیار نہیں ہیں۔

نمرہ شاہد نے دانش تیمور کے ساتھ اسکرین شیئر کرنے کی اپنی پرانی خواہش کا اعادہ کرتے ہوئے کہا”میں کئی مرتبہ مختلف انٹرویوز میں یہ بات کہہ چکی ہوں کہ میں دانش تیمور کے ساتھ کام کرنے کی شدید خواہش مند ہوں، کیونکہ وہ بطور اداکار مجھے بہت پسند ہیں اور عوام میں ان کی مقبولیت بے پناہ ہے۔ مجھے دانش اور بلال عباس دونوں کا کام بے حد متاثر کرتا ہے۔”