24 گھنٹوں میں 2 کروڑ بیرل تیل آبنائے ہرمز کے راستے عالمی منڈیوں کو روانہ ہوا، کرس رائٹ

امریکہ کے وزیر توانائی کرس رائٹ نے انکشاف کیا ہے کہ گزشتہ 24 گھنٹوں کے دوران اسٹریٹجک اہمیت کی حامل آبی گزرگاہ ‘آبنائے ہرمز’ کے راستے 2 کروڑ بیرل خام تیل عالمی منڈیوں کی جانب روانہ کیا گیا ہے۔

نیویارک میں عالمی توانائی فورم سے خطاب کرتے ہوئے امریکی وزیر توانائی نے بتایا کہ آبنائے ہرمز سے تیل کی ترسیل کا عمل مسلسل جاری ہے، تاہم عالمی سطح پر تیل بردار بحری جہازوں کی آمدورفت کو مکمل طور پر معمول پر آنے میں اب بھی بعض بڑی رکاوٹوں کا سامنا ہے۔

کرس رائٹ نے ایران پر سنگین الزام عائد کرتے ہوئے دعویٰ کیا کہ اس اہم ترین آبی گزرگاہ میں ایران کی جانب سے بچھائی گئی بارودی سرنگیں تیل کی سپلائی کو سو فیصد معمول پر لانے میں تاخیر کا بنیادی سبب بن رہی ہیں۔

واضح رہے کہ آبنائے ہرمز عالمی توانائی کی رسد کے لیے دنیا کا سب سے حساس اور انتہائی اہم ترین بحری راستہ شمار کیا جاتا ہے۔ اس گزرگاہ میں کسی بھی قسم کی رکاوٹ یا کشیدگی بین الاقوامی منڈیوں میں تیل کی قیمتوں اور سپلائی چین پر براہِ راست اور گہرے اثرات مرتب کر سکتی ہے۔