پنجاب کا ایسا شہر جہاں کھیتوں سے سات فٹ سے زائد لمبے تین سانپ برآمد

پنجاب کے ضلع سیالکوٹ کی تحصیل پسرور میں کھیتوں میں آبپاشی کے دوران سات فٹ سے زائد لمبے تین خوفناک سانپ نکلنے سے علاقے میں خوف و ہراس پھیل گیا، تاہم ریسکیو ٹیم نے بروقت کارروائی کرتے ہوئے انہیں بحفاظت پکڑ لیا۔

عینی شاہدین کے مطابق یہ واقعہ پسرور کے نواحی علاقے شاہزادہ روڈ کے قریب پیش آیا، جہاں کسان روٹین کے مطابق اپنے کھیتوں کو پانی لگا رہے تھے کہ اچانک مٹی کے اندر سے سات فٹ سے زائد لمبے تین بڑے سانپ باہر نکل آئے۔ اتنے بڑے سانپوں کو یکایک سامنے دیکھ کر کسانوں میں کھلبلی مچ گئی، جس پر انہوں نے فوری طور پر ایمرجنسی سروس ریسکیو 1122 کو کال کر کے واقعے کی اطلاع دی۔

اطلاع ملتے ہی ریسکیو 1122 کی ٹیم جدید آلات کے ساتھ فوری طور پر موقع پر پہنچ گئی۔ ریسکیو اہلکاروں نے انتہائی پیشہ ورانہ مہارت کا مظاہرہ کرتے ہوئے کسانوں کی جانوں کو خطرے میں ڈالے بغیر کچھ ہی دیر کی محنت کے بعد تینوں سانپوں کو زندہ اور بحفاظت قابو کر لیا۔

ریسکیو حکام کا میڈیا سے گفتگو کرتے ہوئے کہنا تھا کہ ٹیم کی بروقت اور تیز رفتار کارروائی کے باعث کوئی جانی نقصان نہیں ہوا اور صورتحال پر قابو پا لیا گیا، جس کے بعد خوف زدہ کسانوں اور علاقے کے مکینوں نے سکھ کا سانس لیا اور ریسکیو ٹیم کے اس فوری رسپانس پر گہرے اطمینان کا اظہار کیا۔