جی پی ایس پر انحصار، امریکی خاتون نے کار ریل کی پٹری پر چڑھا دی

نیویگیشن سسٹم پر اندھا دھند انحصار بعض اوقات کتنے بڑے حادثے کا سبب بن سکتا ہے، اس کا ایک انوکھا واقعہ امریکہ میں پیش آیا ہے جہاں ایک بزرگ خاتون ڈرائیور نے جی پی ایس (GPS) کی ہدایات پر عمل کرتے ہوئے اپنی کار کو سڑک کے بجائے سیدھا ٹرین کی پٹری پر چڑھا دیا۔

یہ عجیب و غریب واقعہ امریکی ریاست واشنگٹن کے مشہور شہر سیٹل (Seattle) میں پیش آیا، جہاں ایک 70 سالہ خاتون نے پٹری پر کار چلا دی، جس کے نتیجے میں ریلوے انتظامیہ کو فوری طور پر ٹرین سروس معطل کرنا پڑی۔

پولیس اور ریسکیو حکام کو دیے گئے اپنے ابتدائی بیان میں خاتون ڈرائیور کا کہنا تھا کہ وہ دورانِ سفر راستے کی رہنمائی کے لیے موبائل میں موجود جی پی ایس (GPS) کو فالو کر رہی تھیں۔ نیویگیشن سسٹم کی غلطی یا غلط فہمی کے باعث وہ کار سڑک سے موڑ کر ٹرین کی پٹری پر لے آئیں اور انہیں اندازہ نہیں ہو سکا۔

 عینی شاہدین کا کہنا ہے کہ خاتون پٹری پر آنے کے بعد فوری طور پر نہیں رکیں، بلکہ وہ پٹری کے اوپر ہی کافی فاصلے تک گاڑی چلاتی ہوئی آگے نکل گئیں۔ ٹرین کی پٹری پر اچانک کار آ جانے کے باعث پورے روٹ پر ٹرین سروس بری طرح متاثر ہوئی، جس کی وجہ سے سینکڑوں مسافروں کو اپنی منزل پر پہنچنے کے لیے شدید تاخیر کا سامنا کرنا پڑا۔

ریلوے اور مقامی انتظامیہ کے مطابق، جیسے ہی پٹری پر کار کی موجودگی کا علم ہوا، فوری طور پر فائر ڈپارٹمنٹ کی ٹیموں کو روانہ کیا گیا۔ ریسکیو اہلکاروں نے ہیوی مشینری اور کرین کی مدد سے کار کو پٹری سے کامیابی کے ساتھ ہٹا کر ٹریک کو کلیئر کیا۔

انتظامیہ نے واضح کیا ہے کہ ابتدائی تحقیقات کے مطابق حادثے کا شکار ہونے والی خاتون نشے کی حالت میں بالکل نہیں تھیں اور یہ ایک خالصتاً حادثہ تھا۔ تاہم، احتیاطی تدابیر کے طور پر اور بزرگ خاتون کی ذہنی و جسمانی حالت کا جائزہ لینے کے لیے انہیں تفصیلی طبی معائنے کے لیے قریبی ہسپتال منتقل کر دیا گیا ہے۔