اٹلی میں 4 پاکستانیوں کے قتل کی تحقیقات جاری، پاکستانی سفارت خانہ متحرک

جنوبی اٹلی میں 4 پاکستانیوں کے مبینہ قتل کے واقعے نے تشویش کی لہر دوڑا دی ہے، جبکہ پاکستان کے دفتر خارجہ نے کہا ہے کہ معاملے پر قریبی نظر رکھی جا رہی ہے۔

ترجمان دفتر خارجہ کے مطابق واقعے سے متعلق موصول ہونے والی اطلاعات نہایت افسوسناک ہیں۔ جاں بحق افراد کو پاکستانی نژاد خاندانوں سے تعلق رکھنے والا قرار دیا جا رہا ہے، تاہم ان کی شہریت کی تصدیق کا عمل ابھی جاری ہے۔

ترجمان نے بتایا کہ مقامی پولیس واقعے کی مکمل تحقیقات کر رہی ہے اور فرانزک شواہد کی مدد سے حقائق تک پہنچنے کی کوشش کی جا رہی ہے۔ انہوں نے کہا کہ اٹلی میں پاکستانی سفارت خانہ متعلقہ حکام سے رابطے میں ہے اور معاملے کی ہر سطح پر پیروی کر رہا ہے۔

اطالوی ذرائع ابلاغ کے مطابق واقعہ جنوبی اٹلی کے ایک فارم ہاؤس میں پیش آیا جہاں چار پاکستانی کارکن مبینہ طور پر قتل کر دیے گئے۔ اطلاعات کے مطابق مقتولین کی لاشوں کو بھی جلایا گیا۔

رپورٹس میں بتایا گیا ہے کہ اطالوی پولیس نے اس واقعے کے سلسلے میں دو پاکستانی باشندوں کو حراست میں لیا ہے جبکہ مزید شواہد جمع کیے جا رہے ہیں۔

حکام کے مطابق تحقیقات مکمل ہونے کے بعد ہی واقعے کی اصل وجوہات اور ذمہ داروں کے بارے میں حتمی معلومات سامنے آ سکیں گی۔