ایرانی صدر کی اسلامی ممالک کے درمیان عدم جارحیت کے معاہدے کی تجویز

ایرانی صدر مسعود پزشکیان نے تہران میں منعقدہ ’اسلامی اتحاد کانفرنس‘ سے خطاب کرتے ہوئے خطے کے تمام اسلامی ممالک کے درمیان عدم جارحیت (Non-Aggression Pact) کے باضابطہ معاہدے کی تجویز پیش کر دی ہے۔ انہوں نے واضح کیا کہ ایران ہمسایہ ممالک کے ساتھ مشترکہ سکیورٹی انتظامات کے قیام کے لیے تیار ہے اور اگر مسلم ممالک کے درمیان کوئی تنازع پیدا ہو تو اسے باہمی گفت و شنید سے خود حل کرنا چاہیے۔ ایرانی صدر نے زور دے کر کہا کہ تہران یہ پیشکش کسی کمزوری کے تحت نہیں بلکہ جنگ کے تلخ تجربات کی بنیاد پر کر رہا ہے۔ انہوں نے اسلامی ممالک سے اپیل کی کہ وہ ایک دوسرے کے خلاف کارروائیوں کے لیے اپنی سرزمین اور پلیٹ فارم استعمال نہ ہونے دیں اور خطے میں پائیدار امن و استحکام کے لیے باہمی تعاون کو فروغ دیں۔