محسن نقوی کا ایف آئی اے اور پاسپورٹ دفاتر کا دورہ، غفلت پر عملے کو ہٹانے کا حکم

وفاقی وزیر داخلہ محسن نقوی نے ایف آئی اے زونل آفس لاہور کا دورہ کیا اور ایک خصوصی اجلاس کی صدارت کی، جس میں ایف آئی اے اپ گریڈیشن پراجیکٹ کو جلد مکمل کرنے کی ہدایت کی گئی۔ وزیر داخلہ نے انسانی اسمگلنگ اور حوالہ ہنڈی کے خلاف گھیرا تنگ کرنے اور اس کے نیٹ ورک کو قانون کی گرفت میں لانے کا حکم دیا، جبکہ ایئرپورٹس پر امیگریشن کاؤنٹرز کے کیمرے تبدیل کرنے اور شکایات کے لیے ’پاک آئی ڈی‘ ایپ کے استعمال کا اصولی فیصلہ بھی کیا۔ بعد ازاں، محسن نقوی نے گوجرانوالہ میں نادرا کے 24 گھنٹے فعال میگا سنٹر کا دورہ کر کے وہاں پاسپورٹ کاؤنٹر قائم کرنے کا اعلان کیا۔ انہوں نے گوجرانوالہ کے ریجنل پاسپورٹ آفس کا بھی اچانک دورہ کیا جہاں وقت سے قبل دفتر بند پانے، شہریوں کا داخلہ روکنے اور سہ پہر میں ہی صفائی شروع کرنے پر شدید برہمی کا اظہار کرتے ہوئے تمام عملے کو فوری طور پر عہدوں سے ہٹانے کے احکامات جاری کر دیے۔