سی آئی اے سربراہ کا دورہ ماسکو روس کو نیٹو ممالک پر حملے سے باز رہنے کا انتباہ تھا، امریکی اخبار

امریکی اخبار ’وال اسٹریٹ جرنل‘ کی رپورٹ کے مطابق امریکی خفیہ ایجنسی سی آئی اے (CIA) کے ڈائریکٹر جان ریٹکلف کے رواں ہفتے ماسکو کے اچانک دورے کا مقصد روس کو نیٹو اتحادی ممالک پر کسی بھی قسم کے حملے سے باز رہنے کا انتباہ دینا تھا۔ یہ کسی سی آئی اے چیف کا ماسکو کا پہلا اعلانیہ دورہ تھا، جو امریکی انٹیلی جنس کے ان جائزوں کے بعد کیا گیا جس کے مطابق روسی صدر ولادیمیر پیوٹن آئندہ چند سالوں میں محدود دراندازی یا سائبر حملوں کے ذریعے نیٹو کے عزم کو آزمانے کی کوشش کر سکتے ہیں۔ کریملن کے ترجمان دمتری پیسکوف کے مطابق جان ریٹکلف نے دورے کے دوران روسی انٹیلی جنس حکام سے مذاکرات کیے، تاہم ان کی صدر پیوٹن سے براہِ راست ملاقات نہیں ہوئی۔ دوسری جانب، وائٹ ہاؤس اور سی آئی اے نے دورے کی تفصیلی معلومات فراہم کرنے سے گریز کیا ہے جبکہ امریکی صدر ڈونلڈ ٹرمپ نے اس دورے کو معمول کی کارروائی قرار دیا ہے۔