ایران کیساتھ فی الحال کوئی مذاکرات نہیں ہو رہے: ترجمان وائٹ ہاؤس

وائٹ ہاؤس کی پریس سیکریٹری کیرولین لیویٹ نے تصدیق کی ہے کہ اس وقت امریکا اور ایران کے درمیان جنگ کے خاتمے یا نئے معاہدے کے لیے کوئی براہِ راست مذاکرات نہیں ہو رہے، اور یہ صورتحال اس وقت تک برقرار رہے گی جب تک امریکی صدر ڈونلڈ ٹرمپ کو ایران کی جانب سے سنجیدہ بات چیت کی یقین دہانی نہ ملے۔ انہوں نے واضح کیا کہ صدر ٹرمپ کا بنیادی مقصد ایران کو جوہری ہتھیاروں کے حصول سے روکنا ہے، جبکہ فوجی کارروائی کے بعد اب اقتصادی دباؤ بڑھانے پر توجہ مرکوز کی گئی ہے تاہم تمام تر اختیارات تاحال کھلے ہیں۔ وائٹ ہاؤس کا یہ بیان ایک ایسے وقت میں سامنے آیا ہے جب قطری وزیراعظم شیخ محمد بن عبدالرحمان آل ثانی تہران میں ایرانی حکام سے ملاقاتیں کر کے کشیدگی میں کمی اور آبنائے ہرمز میں عارضی بحری راہداری کے قیام کے لیے سفارتی کوششوں میں مصروف ہیں، جبکہ امریکی وزیر خزانہ اسکاٹ بیسنٹ نے بھی ایران پر ثانوی معاشی پابندیوں کا عندیہ دے دیا ہے۔