کے پی میں شعبۂ انصاف کیلئے اب تک کا سب سے زیادہ بجٹ مختص، چیف جسٹس کا اظہار اطمینان

چیف جسٹس آف پاکستان کی زیرِ صدارت خیبر پختونخوا کے شعبۂ انصاف کے اقدامات سے متعلق ایک اعلیٰ سطح کا اہم اجلاس منعقد ہوا، جس میں صوبے میں عدالتی انفراسٹرکچر، سروس ڈیلیوری اور عام آدمی کی انصاف تک رسائی میں بہتری کے اقدامات کا تفصیلی جائزہ لیا گیا۔ چیف جسٹس نے خیبر پختونخوا میں شعبۂ انصاف کے لیے اب تک کا سب سے زیادہ بجٹ مختص کیے جانے کو سراہتے ہوئے کہا کہ یہ صوبائی حکومت کے مضبوط عزم کو ظاہر کرتا ہے۔ اجلاس میں تمام عدالتی کمپلیکسز کو شمسی توانائی پر منتقل کرنے، ای لائبریریوں کے قیام، خواتین کے سہولت مراکز اور پینے کے صاف پانی کی فراہمی سے متعلق جاری منصوبوں پر پیش رفت کا جائزہ لیا گیا۔ چیف جسٹس پاکستان نے حاصل کردہ پیش رفت پر اطمینان کا اظہار کرتے ہوئے ہدایت کی کہ عوام کو بہتر اور تیز ترین سروس ڈیلیوری کی فراہمی کے لیے تمام متعلقہ اداروں کے درمیان مسلسل اور مؤثر رابطہ برقرار رکھا جائے۔ اس اہم اجلاس میں سپریم کورٹ، پشاور ہائی کورٹ کے ججز اور اعلیٰ صوبائی حکام نے شرکت کی۔