جماعت اسلامی کا 3 ستمبر کو ملک گیر ہڑتال کا اعلان

امیر جماعت اسلامی حافظ نعیم الرحمان نے پٹرولیم مصنوعات کی قیمتوں میں فوری کمی اور بجلی کے بھاری بلوں کے خلاف 3 ستمبر کو ملک گیر ہڑتال کا اعلان کر دیا ہے۔ انہوں نے اپنے بیان میں واضح کیا کہ عوام مہنگائی سے تنگ آ کر سڑکوں پر نکل آئے ہیں اور یہ ہڑتال مکمل طور پر پرامن ہوگی جس میں کسی قسم کا تشدد یا توڑ پھوڑ نہیں کی جائے گی۔ حافظ نعیم الرحمان کا کہنا تھا کہ جماعت اسلامی ہڑتال کو کامیاب بنانے کے لیے تاجر برادری سے رابطہ کرے گی اور وہ خود اس سلسلے میں لاہور کے تاجروں سے ملاقاتیں کریں گے۔ انہوں نے تاجروں سے اپیل کی کہ وہ حکومتی لالی پاپ اور باتوں میں آئے بغیر عوام کے ساتھ کھڑے ہوں اور بجلی کی قیمتوں میں اضافے اور پٹرولیم بم کے خلاف اس ملک گیر احتجاجی تحریک کا حصہ بنیں۔