آئندہ مالی سال کیلئے 4 فیصد معاشی شرح نمو کا ہدف مقرر، مہنگائی 8.2 فیصد رہنے کا امکان

سالانہ منصوبہ بندی رابطہ کمیٹی کے اعلامیے کے مطابق مالی سال 2026-27 کے لیے ملکی معیشت کی شرح نمو کا ہدف 4 فیصد مقرر کر دیا گیا ہے، جبکہ مختلف معاشی شعبوں کے لیے بھی ترقیاتی اہداف تجویز کیے گئے ہیں۔

اعلامیے میں کہا گیا ہے کہ آئندہ مالی سال کے دوران زرعی شعبے کی شرح نمو کا ہدف 3.8 فیصد جبکہ صنعتی شعبے کی شرح نمو کا ہدف 4 فیصد تجویز کیا گیا ہے۔ اسی طرح خدمات کے شعبے کی ترقی کی شرح 4.2 فیصد رہنے کا تخمینہ لگایا گیا ہے۔

دستاویز کے مطابق آئندہ مالی سال میں مہنگائی کی اوسط شرح 8.2 فیصد رہنے کا امکان ظاہر کیا گیا ہے۔ معاشی سرگرمیوں کو فروغ دینے کے لیے سرمایہ کاری کا ہدف مجموعی قومی پیداوار کے 15 فیصد تک بڑھانے کی تجویز بھی پیش کی گئی ہے۔

اعلامیے میں قومی بچتوں کا ہدف مجموعی قومی پیداوار کے 14.3 فیصد کے مساوی مقرر کیا گیا ہے۔ وزارت خزانہ نے مجوزہ معاشی اہداف کو حقیقت پسندانہ اور قابل حصول قرار دیتے ہوئے ان کی حمایت کی ہے۔

اعلامیے کے مطابق اسٹیٹ بینک نے بھی مالی سال 2026-27 کے معاشی اہداف کی توثیق کی ہے جبکہ وزارت تجارت نے برآمدات اور درآمدات کے مجوزہ اہداف سے اتفاق کیا ہے۔