یوٹیوب میں نیا اے آئی فیچر، صارفین اپنی ہوم فیڈ خود تبدیل کر سکیں گے

یوٹیوب نے صارفین کے تجربے کو مزید بہتر بنانے کے لیے ایک نیا اے آئی فیچر متعارف کرا دیا ہے جس کے ذریعے اب صارفین اپنی ہوم فیڈ کو اپنی دلچسپیوں کے مطابق تبدیل کر سکیں گے۔

تفصیلات کے مطابق یوٹیوب پر لاگ اِن ہونے کے بعد اکثر صارفین کو ایک ہی نوعیت کی ویڈیوز نظر آتی ہیں، تاہم نئے فیچر کا مقصد اس تجربے کو زیادہ ذاتی نوعیت کا بنانا ہے۔

کمپنی کے مطابق صارفین ایک مخصوص پرومپٹ کے ذریعے مصنوعی ذہانت کو اپنی پسندیدہ دلچسپیوں سے آگاہ کریں گے، جس کی بنیاد پر ہوم فیڈ کو دوبارہ ترتیب دیا جائے گا۔

یوٹیوب کا کہنا ہے کہ اس نئے نظام کے تحت صارفین اپنی مرضی کے موضوعات اور ویڈیوز کے رجحانات کو بیان کریں گے، جس سے ایک مکمل طور پر کسٹمائزڈ فیڈ تیار کی جائے گی۔

یہ فیچر فی الحال ابتدائی طور پر امریکا میں متعارف کرایا گیا ہے، جبکہ اسے مرحلہ وار دیگر ممالک میں بھی فراہم کیا جائے گا۔