ضمنی انتخاب: پنجاب کے دونوں حلقوں کے غیر سرکاری نتائج کے مطابق مسلم لیگ ن کامیاب

قومی اسمبلی کے حلقے این اے 77 گوجرانوالہ اور پنجاب اسمبلی کے حلقہ پی پی 203 میں منعقدہ ضمنی انتخابات میں پاکستان مسلم لیگ (ن) نے میدان مار لیا ہے۔ غیر حتمی و غیر سرکاری نتائج کے مطابق این اے 77 سے مسلم لیگ (ن) کے امیدوار راشد بشیر ورک کامیاب قرار پائے، جس کے بعد سائرہ افضل تارڑ، بلال فاروق تارڑ اور خرم دستگیر سمیت پارٹی رہنماؤں اور کارکنوں نے مرکزی دفتر میں جشن منایا، مٹھائیاں تقسیم کیں اور آتش بازی کی۔ دوسری جانب پی پی 203 کے تمام 185 پولنگ اسٹیشنز کے غیر حتمی نتائج کے مطابق مسلم لیگ (ن) کے اسد حنیف جٹ 41 ہزار 245 ووٹ حاصل کر کے 18 ہزار 78 ووٹوں کی برتری سے فاتح رہے، جبکہ تحریک احساس پاکستان کے محمد اویس گجر 23 ہزار 167 ووٹ لے کر دوسرے نمبر پر رہے۔ واضح رہے کہ پی پی 203 کی نشست ن لیگ کے رکن پنجاب اسمبلی چودھری محمد حنیف جٹ کے انتقال کے باعث خالی ہوئی تھی۔