گوگل کا ہیکرز کا خفیہ ترین منصوبہ ناکام بنانے کا دعویٰ

کیلیفورنیا: ٹیک دنیا کی سب سے بڑی کمپنی ’گوگل‘ نے ایک انتہائی تشویشناک انتباہ جاری کرتے ہوئے انکشاف کیا ہے کہ ہیکرز نے تاریخ میں پہلی بار آرٹیفیشل انٹیلیجنس (اے آئی) کا استعمال کرتے ہوئے دنیا کا خطرناک ترین اور خفیہ ترین ہیکنگ منصوبہ تیار کیا ہے۔

گوگل کے ’تھریٹ انٹیلیجنس گروپ‘ (Threat Intelligence Group) کی جانب سے جاری کردہ تازہ ترین رپورٹ کے مطابق، سائبر مجرموں نے جدید ترین اے آئی ماڈلز کا غلط استعمال کر کے ایک ایسا ڈیجیٹل ہتھیار تیار کیا ہے جسے سیکیورٹی کی زبان میں ’زیرو ڈے شارٹ کٹ‘ (سیکیورٹی نقص) کہا جاتا ہے۔ اس حملے کی خاص بات یہ ہے کہ یہ سسٹم کے اندر موجود ہونے کے باوجود کسی بھی عام سیکیورٹی ٹول کی گرفت میں نہیں آتا۔

رپورٹ میں مزید بتایا گیا ہے کہ یہ نقص (Vulnerability) اس قدر پوشیدہ اور پیچیدہ ہے کہ عام طور پر دنیا کے صفِ اول کے سافٹ ویئر انجینئرز بھی اس کا پتا لگانے میں ناکام رہتے ہیں۔ تاہم، گوگل کے سائبر سیکیورٹی ماہرین نے بروقت کارروائی کرتے ہوئے ہیکرز کے اس بڑے عالمی حملے کو کامیابی سے ناکام بنا دیا ہے۔

سائبر سیکیورٹی سے متعلق سامنے آنے والی ایک اور رپورٹ کے اعداد و شمار انتہائی چونکا دینے والے ہیں، جس کے مطابق دنیا بھر میں اے آئی بوٹس (AI Bots) کے ذریعے کیے جانے والے سائبر حملوں میں ریکارڈ 10 گنا اضافہ ہوا ہے۔ گزشتہ ایک سال کے قلیل عرصے کے دوران یہ حملے 20 لاکھ سے غیر معمولی حد تک بڑھ کر 2 کروڑ 50 لاکھ کی خطرناک سطح تک پہنچ چکے ہیں۔

سائبر ماہرین کا اس صورتحال پر تشویش کا اظہار کرتے ہوئے کہنا ہے کہ موجودہ دور میں جہاں ایک طرف بڑی ٹیکنالوجی کمپنیاں سیکیورٹی سسٹمز کو مضبوط بنانے کے لیے نئے اے آئی ماڈلز تیار کر رہی ہیں، وہیں دوسری طرف ہیکرز چوری چھپے انہی ماڈلز تک رسائی حاصل کر کے انہیں اپنے مذموم اور غلط مقاصد کے لیے استعمال کر رہے ہیں۔ ماہرین نے عالمی اداروں کو اپنے سیکیورٹی فریم ورک کو فوری طور پر جدید ترین ٹیکنالوجی سے ہم آہنگ کرنے کا مشورہ دیا ہے۔