خبردار! غیرقانونی سم اجراء کی روک تھام کیلئے نگرانی مزید سخت

پاکستان ٹیلی کمیونیکیشن اتھارٹی (PTA) نے ملک بھر میں غیر قانونی اور مشکوک سموں کے اجراء اور ان کے غلط استعمال کی روک تھام کے لیے نگرانی کا نظام مزید سخت کرتے ہوئے قوانین میں بڑی تبدیلیاں کر دی ہیں۔ پی ٹی اے کی جانب سے جاری کردہ نئے ضابطہ اخلاق کے تحت اب سموں کی ملکیت کی تبدیلی (Ownership Transfer) کے عمل کو سخت مانیٹر کیا جائے گا۔

پی ٹی اے نے جعل سازی کے خاتمے کے لیے سم اپنے نام سے ہٹانے یا دوسرے کے نام منتقل کرنے کی کم از کم مدت کو 60 دن سے یکمشت بڑھا کر 365 دن (ایک سال) کر دیا ہے۔ اس نئے قانون کے بعد اب مارکیٹ میں فعال (ایکٹیویٹ) ہونے والی کوئی بھی نئی سم ایک سال کی مدت پوری ہونے سے پہلے کسی دوسرے کے نام منتقل کرنا یا اپنے نام سے ہٹانا ممکن نہیں ہوگا۔

پی ٹی اے حکام نے موبائل فون آپریٹرز، فرنچائزز اور صارفین کے لیے درج ذیل اہم ہدایات جاری کی ہیں:

• فرنچائزز کے لیے الرٹ: سموں کے اجراء اور سیلز کے دوران بائیو میٹرک تصدیق (Biometric Verification) کے عمل میں انتہائی احتیاط برتی جائے اور کسی بھی صارف کی انگلیوں کے نشانات (Fingerprints) کا غیر قانونی استعمال ہرگز نہ کیا جائے۔

• صارفین کے لیے مشورہ: شہری اپنے شناختی ڈیٹا اور قومی شناخت کے تحفظ کے لیے اپنے شناختی کارڈ (CNIC) پر رجسٹرڈ سموں کی کل تعداد باقاعدگی سے چیک کرتے رہیں۔

پی ٹی اے کی جانب سے جاری کردہ باقاعدہ اعلامیے میں شہریوں کو خبردار کیا گیا ہے کہ وہ اپنے شناختی کارڈ پر صرف اور صرف وہی سمز رجسٹرڈ رکھیں جو ان کے اپنے ذاتی زیرِ استعمال ہیں۔

مشکوک رجسٹریشن پر فوری ایکشن: اگر کسی بھی شہری کو اپنے شناختی کارڈ پر کسی ایسی سم کی رجسٹریشن کا علم ہو جو انہوں نے خود جاری نہیں کروائی یا وہ غیر مجاز/مشکوک معلوم ہو، تو وہ بغیر کسی تاخیر کے فوری طور پر متعلقہ موبائل نیٹ ورک آپریٹر (فرنچائز) کو اس کی اطلاع دیں اور اسے بلاک کروائیں۔ احتیاط برتیں تاکہ آپ کا شناختی کارڈ کسی بھی قسم کی مجرمانہ یا غیر قانونی سرگرمی میں استعمال ہونے سے محفوظ رہ سکے