انسٹا گرام کی جانب سے خودکار طور پر غائب ہونیوالی فوٹوز پر مشتمل نئی ایپ انسٹنٹس متعارف

سوشل میڈیا پلیٹ فارم انسٹاگرام نے اپنی ایک نئی اور منفرد ایپلی کیشن ’انسٹنٹس‘ (Instants) متعارف کرانے کا اعلان کیا ہے۔ یہ ایپ خاص طور پر ان صارفین کے لیے ڈیزائن کی گئی ہے جو اپنی حقیقی زندگی کے لمحات کو بغیر کسی بناوٹ یا ایڈیٹنگ کے فوری طور پر شیئر کرنا چاہتے ہیں۔

 اس ایپ کے ذریعے شیئر کی گئی تصاویر ایک بار دیکھے جانے کے بعد خود بخود غائب ہو جائیں گی۔ اگر تصویر نہ دیکھی جائے تو یہ 24 گھنٹوں تک دستیاب رہے گی، جس کے بعد وہ ڈیلیٹ ہو جائے گی۔ ایپ میں ایک کلک پر تصویر کھینچی جا سکے گی، لیکن اسے ایڈٹ کرنے یا فلٹرز لگانے کی اجازت نہیں ہوگی۔ صرف ٹیکسٹ (تحریر) ایڈ کرنے کی سہولت دی گئی ہے۔ صارفین فون گیلری میں پہلے سے موجود تصاویر اپ لوڈ نہیں کر سکیں گے، بلکہ انہیں صرف ایپ کے اندرونی کیمرے سے ہی تصویر کھینچ کر شیئر کرنا ہوگی۔ سیکیورٹی اور پرائیویسی کو مدنظر رکھتے ہوئے کمپنی نے ’انسٹنٹس‘ فوٹوز کے اسکرین شاٹ لینے پر پابندی عائد کی ہے۔ البتہ بھیجی گئی تصاویر کو ایک پرائیویٹ فولڈر میں محفوظ کیا جا سکے گا۔کمپنی کے مطابق اس ایپ کی تصاویر کو انسٹاگرام فالوورز اور فرینڈز کے ساتھ شیئر کیا جا سکے گا۔ اسے الگ ایپ کے علاوہ انسٹاگرام کے اندر بھی استعمال کیا جا سکتا ہے، جہاں ان باکس (Inboxes) میں نیچے دائیں کونے میں یہ تصاویر دیکھی جا سکیں گی اور صارف خود منتخب کر سکے گا کہ وہ کن افراد کو یہ تصاویر بھیجنا چاہتا ہے۔

کمپنی کا کہنا ہے کہ انسٹاگرام کے برعکس، جہاں لوگ عام طور پر بہت زیادہ ایڈٹ شدہ تصاویر پوسٹ کرتے ہیں، ’انسٹنٹس‘ کا مقصد زندگی کے حقیقی اور غیر فلٹر شدہ لمحات کو دوسروں تک پہنچانا ہے۔