امریکا: فال نکالنے والی مشین نے لاکھوں ڈالر کا انعام جتوا دیا

امریکی ریاست مشی گن میں ایک شخص کی تین دہائیوں پر محیط ثابت قدمی رنگ لے آئی، جہاں اس نے ’فال نکالنے والی مشین‘ کے بتائے ہوئے نمبروں کی بدولت 10 لاکھ ڈالر کا خطیر انعام جیت لیا۔ ریاست کے علاقے فرے زر سے تعلق رکھنے والے 56 سالہ اسٹیفن ہیوسجن نے مشی گن لاٹری حکام کو بتایا کہ انہوں نے 22 اپریل کی پاور بال قرعہ اندازی کے لیے وہی نمبر منتخب کیے تھے جو وہ پچھلے 30 سال سے استعمال کر رہے تھے۔

اسٹیفن کے مطابق، تقریباً 30 برس قبل لاس ویگاس کے دورے کے دوران انہوں نے ایک مشہور ’زولٹر مشین‘ (Zoltar machine) سے اپنی فال نکلوائی تھی، جس نے انہیں خوش قسمت نمبروں کا ایک سیٹ دیا تھا۔ تب سے وہ مسلسل انہی نمبروں پر قسمت آزما رہے تھے۔ 22 اپریل کو ان کا ٹکٹ (24-29-32-49-63) قرعہ اندازی کی پانچ سفید گیندوں سے میچ کر گیا، جس کی اطلاع انہیں اگلے دن ای میل کے ذریعے ملی۔ اسٹیفن کا کہنا ہے کہ وہ اس رقم سے اپنے گھر اور گاڑی کے قرضے ادا کریں گے، تفریحی دورے پر جائیں گے اور باقی رقم ریٹائرمنٹ کے لیے محفوظ کریں گے۔