پنجاب میں مقامی آرٹیفیشل انٹیلی جنس پلیٹ فارم قائم کرنے کا فیصلہ

پنجاب حکومت نے ڈیجیٹل گورننس اور ٹیکنالوجی کے میدان میں ایک انقلابی قدم اٹھاتے ہوئے اپنا مقامی آرٹیفیشل انٹیلی جنس (AI) پلیٹ فارم قائم کرنے کا فیصلہ کیا ہے۔ اس سلسلے میں “گورنمنٹ جی پی یو کلاؤڈ” منصوبے کی باقاعدہ منظوری دے دی گئی ہے، جس کا مقصد سرکاری نظام کو جدید بنانا اور مقامی سطح پر اے آئی ٹیکنالوجی کی ترقی کو فروغ دینا ہے۔

اس منصوبے کی خاص بات یہ ہے کہ اب بڑے لینگویج ماڈلز (LLMs) کو مقامی سطح پر ہوسٹ اور ٹرین کیا جا سکے گا، جس میں اردو سمیت دیگر مقامی زبانوں کی سپورٹ بھی شامل ہوگی۔ حکومت نے حساس سرکاری ڈیٹا کو غیر ملکی کلاؤڈ پر منتقل کرنے کو سیکیورٹی کے لحاظ سے خطرناک قرار دیتے ہوئے اس مقامی انفراسٹرکچر کی اہمیت پر زور دیا ہے۔ منصوبے کے تحت سرکاری اداروں اور جامعات کو ایک محفوظ “اے آئی سینڈ باکس” فراہم کیا جائے گا تاکہ تحقیق اور ترقی کا عمل تیز ہو سکے۔

حکام کا کہنا ہے کہ ابتدائی تجربات میں وائس انٹرفیس اور ذہین سرچ سسٹمز کو کامیاب پایا گیا ہے۔ پنجاب حکومت اس وقت 13 کروڑ سے زائد شہریوں کو 50 سے زائد شعبوں میں خدمات فراہم کر رہی ہے، اور اس نئے ٹیکنالوجی پلیٹ فارم سے نہ صرف سرکاری ملازمین کی کارکردگی بڑھے گی بلکہ عوامی خدمات کی فراہمی میں بھی شفافیت اور تیزی آئے گی۔