سمپسن کارٹون میں برسوں پہلے ہنٹا وائرس سے متعلق کیا دکھایا گیا تھا؟

مشہورِ زمانہ امریکی کارٹون سیریز ’دی سمپسنز‘ (The Simpsons) ایک بار پھر اپنی مبینہ پیشگوئیوں کی وجہ سے انٹرنیٹ پر توجہ کا مرکز بنی ہوئی ہے۔ سوشل میڈیا پر یہ دعویٰ تیزی سے گردش کر رہا ہے کہ اس سیریز نے برسوں پہلے ایک کروز شپ پر ہنٹا وائرس (Hantavirus) کے پھیلنے کی پیشگوئی کر دی تھی۔ یہ بحث اس وقت شروع ہوئی جب حال ہی میں ایک بحری جہاز پر ہنٹا وائرس کے کیسز سامنے آئے اور صارفین نے اسے 2012 میں نشر ہونے والے ایک ایپی سوڈ سے جوڑ دیا۔

سیریز کے سیزن 23 کے اس ایپی سوڈ میں دکھایا گیا تھا کہ ایک کروز شپ پر وائرس پھیلنے کے بعد صورتحال ابتر ہو جاتی ہے۔ تاہم، فیکٹ چیک رپورٹس نے اس مبینہ پیشگوئی کی حقیقت واضح کر دی ہے۔ تحقیق کے مطابق، کارٹون میں دکھایا گیا وائرس حقیقی نہیں تھا بلکہ کہانی کے مرکزی کردار ’بارٹ سمپسن‘ نے اپنی چھٹیاں لمبی کرنے کے لیے وائرس کی جھوٹی خبر پھیلائی تھی۔ ماہرین کا کہنا ہے کہ ’دی سمپسنز‘ دہائیوں سے نشر ہو رہا ہے اور اس میں ہزاروں موضوعات دکھائے گئے ہیں، اس لیے بعض اوقات اتفاقیہ طور پر کوئی منظر حقیقی واقعے سے مشابہہ ہو سکتا ہے، لیکن اسے باقاعدہ پیشگوئی قرار دینا درست نہیں۔