امریکا میں کتوں کی پُول پارٹی کا انعقاد

امریکی ریاست فلوریڈا کے شہر میامی میں پالتو جانوروں کی مصنوعات فراہم کرنے والی ایک کمپنی نے عالمی ریکارڈ قائم کرنے کے لیے ایک انوکھی ’ڈاگ پول پارٹی‘ کا انعقاد کیا۔ چیوی بارک پارک میں منعقدہ اس تقریب میں مختلف نسلوں اور سائز کے 277 کتوں کو جمع کیا گیا، جہاں ان کے لیے خصوصی طور پر تیار کردہ چھوٹے پولز میں نہانے اور ڈبکی لگانے کا انتظام کیا گیا تھا۔

اس دلچسپ تقریب کی نگرانی اور کتوں کی درست تعداد کی تصدیق کے لیے گینیز ورلڈ ریکارڈز کا ایک آفیشل جج بھی موقع پر موجود رہا۔ انتظامیہ کو قوی امید ہے کہ 277 کتوں کی یہ بڑی تعداد اسے دنیا کی سب سے بڑی ’ڈاگ پول پارٹی‘ کے طور پر عالمی ریکارڈ کی فہرست میں شامل کروانے کے لیے کافی ہوگی۔ سوشل میڈیا پر اس تقریب کی ویڈیوز اور تصاویر نے جانوروں سے محبت کرنے والوں کی بھرپور توجہ حاصل کر لی ہے۔