جعلسازوں کا پی ٹی اے کا نام پر فراڈ شروع، ایڈوائزری جاری

آن لائن فراڈ کرنے والے جعلسازوں نے اب شہریوں کو لوٹنے کے لیے پاکستان ٹیلی کمیونیکیشن اتھارٹی (PTA) کے نام کا سہارا لینا شروع کر دیا ہے۔ ذرائع کے مطابق، جعلساز پی ٹی اے کے نمائندے بن کر فون کالز اور ای میلز کے ذریعے صارفین سے ان کی ذاتی اور بینکنگ معلومات حاصل کرنے کی کوشش کر رہے ہیں۔ اس صورتحال کے پیشِ نظر پی ٹی اے نے عوام کو آن لائن فراڈ سے بچانے کے لیے ایک جامع ہدایت نامہ جاری کیا ہے۔

ایڈوائزری میں واضح کیا گیا ہے کہ پی ٹی اے کبھی بھی فون یا ای میل پر صارفین سے ان کی ذاتی یا خفیہ معلومات طلب نہیں کرتا۔ شہریوں کو ہدایت کی گئی ہے کہ وہ پی ٹی اے کے نام سے آنے والی کسی بھی مشکوک کال، ایس ایم ایس یا ای میل پر ہرگز اعتماد نہ کریں اور نہ ہی ان میں دیے گئے کسی لنک پر کلک کریں، کیونکہ یہ لنکس ڈیٹا چوری کرنے کے لیے استعمال ہو سکتے ہیں۔ پی ٹی اے نے زور دیا ہے کہ صارفین اپنا پاسورڈ، پن کوڈ، شناختی کارڈ نمبر اور بینک اکاؤنٹ کی تفصیلات کسی کے ساتھ شیئر نہ کریں اور ایسی کسی بھی سرگرمی کی فوری اطلاع حکام کو دیں۔