کروڑوں نوری سال دور موجود کہکشاں کی تصویر جاری

یورپین سپیس ایجنسی کی جانب سے جاری کردہ ایک نئی حیرت انگیز تصویر نے خلا کے دلفریب مناظر دیکھنے والوں کو مسحور کر دیا ہے۔ خلا میں موجود ہبل ٹیلی سکوپ سے لی گئی اس تصویر میں اسپائرل کہکشاں NGC 3137 چمکتی ہوئی دیکھی جا سکتی ہے، جو زمین سے تقریباً 5 کروڑ 30 لاکھ نوری سال کے فاصلے پر کانسٹیلیشن اینٹلیا میں واقع ہے۔

ماہرینِ فلکیات اس کہکشاں میں خاص دلچسپی رکھتے ہیں کیونکہ یہ ہماری اپنی ملکی وے کہکشاں جیسے نظاموں کو سمجھنے کا بہترین موقع فراہم کرتی ہے۔ ہبل کی اس تصویر میں بے شمار ستاروں کے جھرمٹ واضح دکھائی دیتے ہیں، جہاں گرد و غبار اور گیس کے بادل سکڑ کر نئے ستاروں کو جنم دے رہے ہیں۔

ماہرین کے مطابق NGC 3137 ایک ایسے کہکشانی گروپ کا حصہ ہے جس میں دو بڑی اسپائرل کہکشائیں اور کئی چھوٹی بونی کہکشائیں شامل ہیں۔ اس شاہکار تصویر کو چھ مختلف رنگوں کی روشنیوں کے امتزاج سے تیار کیا گیا ہے، جس کی بدولت کہکشاں کے وہ حیران کن پہلو اور پوشیدہ تفصیلات بھی نمایاں ہو گئی ہیں جو عام طور پر نظر نہیں آتیں۔