اسلام آباد ہائیکورٹ کی سپرنٹنڈنٹ اڈیالہ جیل کو گرفتاری کی وارننگ؛ بشریٰ بی بی کی ملاقاتوں پر رپورٹ طلب

اسلام آباد ہائیکورٹ میں بانی پی ٹی آئی عمران خان کی اہلیہ بشریٰ بی بی تک ذاتی معالج کی رسائی اور فیملی ملاقاتوں سے متعلق درخواست پر سماعت ہوئی۔ عدالت نے سخت برہمی کا اظہار کرتے ہوئے کہا کہ عدالتی احکامات کے باوجود سپرنٹنڈنٹ اڈیالہ جیل پیش نہیں ہوئے۔ جسٹس ارباب محمد طاہر نے حکم دیا کہ آئندہ سماعت پر سپرنٹنڈنٹ ذاتی حیثیت میں پیش ہوں، بصورت دیگر انہیں گرفتار کر کے عدالت میں پیش کیا جائے گا۔
جسٹس ارباب محمد طاہر نے کیس کی سماعت کی، جبکہ ایڈووکیٹ جنرل اسلام آباد نوید حیات ملک عدالت میں پیش ہوئے۔ بشریٰ بی بی کی بیٹی کی جانب سے وکیل سلمان اکرم راجہ پیش ہوئے۔سماعت کے دوران ایڈووکیٹ جنرل نے عدالت سے ایک دن کی مہلت طلب کرتے ہوئے مؤقف اختیار کیا کہ معاملہ فوری نوعیت کا نہیں ہے، تاہم سلمان اکرم راجہ نے اس کی مخالفت کرتے ہوئے کہا کہ فیملی کو ملاقات کی اجازت نہ ملنا ایک سنگین اور فوری نوعیت کا مسئلہ ہے۔ایڈووکیٹ جنرل نے مؤقف اپنایا کہ بشریٰ بی بی سزا یافتہ قیدی ہیں اور ان سے ملاقاتیں جیل مینوئل کے مطابق ہو رہی ہیں، تاہم وکیل صفائی نے عدالت کو بتایا کہ منگل کے روز بھی ملاقات نہیں کروائی گئی اور آخری بار 24 فروری کو فیملی ممبرز سے ملاقات ہوئی تھی۔سماعت کے دوران ایڈووکیٹ جنرل اور سلمان اکرم راجہ کے درمیان تلخ جملوں کا تبادلہ بھی ہوا۔
اسلام آباد ہائیکورٹ نے بشریٰ بی بی کی طبی حالت اور جیل ملاقاتوں سے متعلق تفصیلی رپورٹ طلب کرتے ہوئے کیس کی مزید سماعت آئندہ منگل تک ملتوی کر دی۔