امریکی صدر نے پراجیکٹ فریڈم روک کر جرات کا مظاہرہ کیا: وزیراعظم کا ٹرمپ سے اظہار تشکر

وزیراعظم شہباز شریف نے سوشل میڈیا پر جاری اپنے بیان میں امریکی صدر ڈونلڈ ٹرمپ کے اس جرات مندانہ اقدام کی تعریف کی ہے جس کے تحت آبنائے ہرمز میں بحری جہازوں کی معاونت کے امریکی منصوبے ‘پروجیکٹ فریڈم’ کو عارضی طور پر روک دیا گیا ہے۔ وزیراعظم نے کہا کہ صدر ٹرمپ نے پاکستان، سعودی عرب اور بالخصوص سعودی ولی عہد شہزادہ محمد بن سلمان کی درخواست پر مثبت ردعمل دے کر بہترین قیادت کا مظاہرہ کیا ہے۔ انہوں نے اس امید کا اظہار کیا کہ یہ پیش رفت خطے میں دیرپا امن، مفاہمت اور سفارت کاری کے ذریعے تنازعات کے حل کی راہ ہموار کرے گی۔