ری سائیکلنگ سینٹر کے باہر لگایا گیا سپیڈ لمٹ سائن توجہ کا مرکز

وسکونسن کے آؤٹاگیمی کاؤنٹی ری سائیکلنگ اینڈ سالِڈ ویسٹ سینٹر نے اپنی حدود میں گاڑیوں کی رفتار کنٹرول کرنے کے لیے روایتی ہندسوں کے بجائے 17.3 میل فی گھنٹہ کا عجیب و غریب سائن بورڈ نصب کیا ہے۔ سینٹر انتظامیہ کے مطابق اس غیر معمولی ہندسے کا مقصد ڈرائیورز کی توجہ حاصل کرنا ہے۔ جب ڈرائیور ایک ایسی سپیڈ لمٹ دیکھتا ہے جو اس نے پہلے کبھی نہیں دیکھی ہوتی، تو وہ اسے دوبارہ دیکھنے پر مجبور ہو جاتا ہے اور اس کا ذہن فوری طور پر چوکنا ہو جاتا ہے۔ انتظامیہ کا ماننا ہے کہ یہ طریقہ لوگوں کو اس ‘ذہنی غفلت’ سے نکالتا ہے جس کا شکار وہ اکثر مانوس راستوں پر ڈرائیونگ کے دوران ہو جاتے ہیں۔