تیز موسیقی سے 140 مرغیوں کی ہلاکت کا مقدمہ درج

بھارتی ریاست اتر پردیش کے ضلع سلطان پور میں ایک انوکھا واقعہ سامنے آیا ہے جہاں شادی کی بارات میں بجنے والی تیز موسیقی نے مبینہ طور پر 140 مرغیوں کو ہلاک کر دیا۔ پولٹری فارم کے مالک صابر علی کے مطابق، 25 اپریل کی رات جب ایک بارات ان کے فارم کے قریب سے گزری تو ڈی جے سسٹم کی غیر معمولی بلند آواز سے مرغیوں میں شدید خوف و ہراس پھیل گیا، جس کے نتیجے میں وہ موقع پر ہی دم توڑ گئیں۔ صابر علی کی شکایت پر پولیس نے ڈی جے آپریٹر کے خلاف مقدمہ درج کر لیا ہے۔ ماہرین کا کہنا ہے کہ پرندے اور جانور بلند آواز کے حوالے سے انتہائی حساس ہوتے ہیں اور شدید شور ان میں جان لیوا تناؤ یا دل کے دورے کا باعث بن سکتا ہے۔