بھارت، 19 ہزار روپے کیلئے قبر کھود دی، بھائی بہن کا ڈھانچہ لے کر بینک پہنچ گیا

بھارتی ریاست اڑیسہ میں ایک افسوسناک اور حیران کن واقعہ پیش آیا ہے جہاں جیتو منڈا نامی شخص اپنی مرحوم بہن کے اکاؤنٹ سے 19 ہزار روپے نکلوانے کے لیے اس کی باقیات (ڈھانچہ) لے کر بینک پہنچ گیا۔ رپورٹس کے مطابق، جیتو کی بہن دو ماہ قبل انتقال کر گئی تھی، تاہم بینک منیجر نے قانونی دستاویزات یا ڈیتھ سرٹیفکیٹ نہ ہونے پر رقم دینے سے انکار کر دیا اور مطالبہ کیا کہ “اکاؤنٹ ہولڈر کو پیش کیا جائے”۔ قانونی پیچیدگیوں سے ناواقف بھائی نے مجبوراً قبر کھود کر بہن کا ڈھانچہ نکالا اور اسے کپڑے میں لپیٹ کر بینک لے آیا۔ اس لرزہ خیز منظر کو دیکھ کر بینک میں موجود افراد سکتے میں آگئے، جبکہ واقعے کی ویڈیو وائرل ہونے پر صارفین نے بینکنگ سسٹم کی بے حسی اور غریب طبقے کی بے بسی پر شدید غم و غصے کا اظہار کیا ہے۔