اوپن اے آئی کی جانب سے اسمارٹ فون تیار کیے جانے کا امکان

آرٹی فیشل انٹیلی جنس کی دنیا کی معروف کمپنی اوپن اے آئی (OpenAI) کی جانب سے ہارڈ ویئر کے کاروبار میں قدم رکھنے کی تیاریاں تیز کر دی گئی ہیں۔ حالیہ رپورٹس کے مطابق، کمپنی میڈیا ٹیک، کوالکوم اور لکس شیئر جیسی بڑی کمپنیوں کے ساتھ مل کر ایک ایسا اسمارٹ فون تیار کر رہی ہے جو موبائل فون کے روایتی تصور کو بدل دے گا۔ اس فون کی خاص بات یہ ہے کہ اس میں مختلف ایپس کے بجائے ‘اے آئی ایجنٹس’ (AI Agents) استعمال کیے جائیں گے، جس سے صارفین کو متعدد ایپلی کیشنز ڈاؤن لوڈ کرنے کی ضرورت نہیں رہے گی۔ رپورٹ میں دعویٰ کیا گیا ہے کہ اس ڈیوائس کی منصوبہ بندی 2027 کی پہلی سہ ماہی تک مکمل کر لی جائے گی جبکہ اس کی بڑے پیمانے پر پروڈکشن 2028 میں متوقع ہے۔ اس کے علاوہ کمپنی 2026 کے آخر تک اے آئی ایئر بڈز بھی متعارف کرا سکتی ہے، تاہم اوپن اے آئی نے ابھی تک ان خبروں کی باضابطہ تصدیق نہیں کی ہے۔