فلٹر لگی تصاویر نے لاپتہ خاتون کی تلاش مشکل بنادی

میکسیکو میں 12 اپریل کو لاپتہ ہونے والی 30 سالہ خاتون، گریسیا گواڈیلوپے، کی بحفاظت واپسی نے سوشل میڈیا پر فلٹرز کے بے جا استعمال کے حوالے سے ایک سنجیدہ بحث کو جنم دے دیا ہے۔ پولیس نے خاتون کی تلاش کے لیے ان کی سوشل میڈیا تصاویر کا سہارا لیا، تاہم اہل خانہ اور قریبی افراد نے نشاندہی کی کہ شدید ایڈیٹنگ اور فلٹرز کی وجہ سے تصاویر میں ان کی شکل اصل حقیقت سے کافی مختلف تھی، جس سے شناخت کے عمل میں شدید مشکلات پیش آئیں۔ سوشل میڈیا صارفین نے بھی سوال اٹھایا کہ ایسی غیر حقیقی تصاویر سے کسی انسان کو کیسے ڈھونڈا جا سکتا ہے۔ خوش قسمتی سے خاتون کو چند روز بعد ایک شاہراہ سے زندہ برآمد کر لیا گیا، لیکن ماہرین نے خبردار کیا ہے کہ لاپتہ افراد کے کیسز میں فلٹرز والی تصاویر مدد کے بجائے تفتیش میں بڑی رکاوٹ ثابت ہو سکتی ہیں