امریکا میں خاتون نے معمر ترین یونی سائیکل سوار کا گینیز ورلڈ ریکارڈ اپنے نام کر لیا

امریکا سے تعلق رکھنے والی ایک معمر خاتون، جو ’یونی سائیکل گرینی‘ کے نام سے مشہور ہیں، نے معمر ترین یونی سائیکل سوار (خاتون) کا گینیز ورلڈ ریکارڈ دوبارہ اپنے نام کر لیا ہے۔کیلیفورنیا کی رہائشی لِنڈا جیریٹ نے یہ سنگِ میل 69 سال اور 189 دن کی عمر میں عبور کیا۔ دلچسپ بات یہ ہے کہ انہوں نے کسی اور کا نہیں بلکہ اپنا ہی پرانا ریکارڈ توڑا ہے۔ اس سے قبل انہوں نے جنوری 2023 میں 66 سال کی عمر میں یہ اعزاز حاصل کیا تھا، تاہم دسمبر 2025 میں ’دی نٹ کریکر‘ نامی شو میں پرفارم کر کے انہوں نے اس ریکارڈ کو مزید بہتر بنا دیا لِنڈا جیریٹ کے فن کی تاریخ کافی پرانی ہے:وہ محض 10 سال کی عمر سے ایک پہیے والی سائیکل (یونی سائیکل) چلا رہی ہیں۔

انہوں نے فلوریڈا اسٹیٹ یونیورسٹی کے ‘فلائنگ سرکس’ سے اپنے سفر کا آغاز کیا۔بعد ازاں، انہوں نے سرکس میں پیشہ ورانہ کیریئر بنایا اور ہالی ووڈ میں بطور ‘اسٹنٹ پرفارمر’ بھی اپنی صلاحیتوں کا لوہا منوایا۔گنیز ورلڈ ریکارڈز سے گفتگو کرتے ہوئے لِنڈا کا کہنا تھا کہ وہ آج بھی مختلف تقریبات میں اپنی مہارت کا مظاہرہ کرتی ہیں۔ انہوں نے یونی سائیکل سیکھنے کے خواہش مند افراد کو مشورہ دیا کہ وہ اس کھیل کا آغاز چھوٹی عمر سے کریں اور مسلسل مشق جاری رکھیں، کیونکہ مستقل مزاجی ہی کامیابی کی کنجی ہے۔لِنڈا جیریٹ کی یہ کامیابی ثابت کرتی ہے کہ عمر محض ایک ہندسہ ہے اور اگر جنون جوان ہو تو کسی بھی عمر میں عالمی ریکارڈ قائم کیا جا سکتا ہے۔