پاکستانی کمپنی سپرنیٹ گلوبل کا افریقہ میں سیٹلائٹ کنیکٹیویٹی منصوبہ کامیابی سے شروع

پاکستان کی آئی ٹی صنعت کے لیے ایک بڑی کامیابی سامنے آئی ہے جہاں معروف مقامی کمپنی سپرنیٹ گلوبل (Supernet Global) نے افریقہ میں اپنے قدم جماتے ہوئے سیٹلائٹ پر مبنی کنیکٹیویٹی سروس کا باضابطہ آغاز کر دیا ہے۔ کمپنی نے تنزانیہ میں اپنا پہلا بڑا منصوبہ کامیابی سے مکمل کیا ہے، جس کے تحت سیٹلائٹ ٹیکنالوجی کے ذریعے ہائی کیپیسٹی انٹرنیٹ فراہم کیا جا رہا ہے۔ یہ پیشرفت ان علاقوں کے لیے گیم چینجر ثابت ہو رہی ہے جہاں روایتی ڈیجیٹل انفراسٹرکچر کی کمی ہے، کیونکہ سیٹلائٹ کے ذریعے تیز رفتار انٹرنیٹ کی فوری تعیناتی ممکن ہو گئی ہے۔

سپرنیٹ گلوبل نے صرف تنزانیہ تک محدود رہنے کے بجائے پورے افریقہ میں آئی سی ٹی انفراسٹرکچر، سائبر سکیورٹی اور ڈیجیٹل سروسز کے شعبوں میں وسیع پیمانے پر توسیع کا منصوبہ بھی تیار کر لیا ہے۔ ماہرین کا ماننا ہے کہ اس عالمی توسیع سے نہ صرف پاکستان کی آئی ٹی برآمدات اور زرمبادلہ میں اضافہ ہوگا بلکہ بین الاقوامی مارکیٹ میں پاکستان کا ایک ابھرتے ہوئے ٹیکنالوجی مرکز کے طور پر تشخص بھی مضبوط ہوگا۔