شادی کی تقریب ہنگامہ آرائی کا شکار، دلہن پر سیاہ پینٹ سے حملہ

برطانیہ میں شادی کی ایک پُروقار تقریب اس وقت ڈرامائی اور افسوسناک صورتحال اختیار کر گئی جب ایک دلہن کے بچپن کے خوابوں کو اس کی اپنی ہی بھابھی نے منٹوں میں خاک میں ملا دیا۔ 35 سالہ جیما مونک، جو اپنے سفید عروسی لباس میں ملبوس والد کا ہاتھ تھامے شادی ہال میں داخل ہو رہی تھیں، اس وقت صدمے میں آگئیں جب ان پر سیاہ رنگ کا پینٹ پھینک دیا گیا۔ اس اچانک حملے نے نہ صرف جیما کے لباس بلکہ پوری تقریب کی خوشیوں کو گہنا دیا۔

امریکی نشریاتی ادارے کی رپورٹ کے مطابق، یہ ناخوشگوار واقعہ کسی اجنبی کی کارروائی نہیں بلکہ ایک طویل عرصے سے چلے آ رہے خاندانی تنازع کا شاخسانہ تھا۔ دلہن کی بھابھی نے خاندانی رنجش کا بدلہ لینے کے لیے اس اہم ترین دن کا انتخاب کیا اور عین اس وقت حملہ کیا جب دلہن سب کی توجہ کا مرکز بنی ہوئی تھی۔ اس واقعے کے بعد تقریب میں موجود مہمانوں میں غم و غصہ پھیل گیا اور شادی کی خوشیاں صدمے میں بدل گئیں۔