ایلون مسک کا اپنے ہی سائبر ٹرک خریدنے کا انکشاف

ایلون مسک کی دو بڑی کمپنیوں، ٹیسلا اور سپیس ایکس کے درمیان ایک غیر معمولی کاروباری تعلق سامنے آیا ہے، جہاں حالیہ اعداد و شمار کے مطابق سپیس ایکس خود اپنی ہی برانڈ ‘ٹیسلا’ کے سائبر ٹرک کی سب سے بڑی خریدار بن کر ابھری ہے۔ بلومبرگ کی رپورٹ اور ایس اینڈ پی گلوبل موبلیٹی کے ڈیٹا کے مطابق، 2025 کی چوتھی سہ ماہی میں امریکہ میں فروخت ہونے والے ہر پانچ میں سے ایک سائبر ٹرک سپیس ایکس نے خریدا۔ یہ خریداری اس وقت کی گئی جب مارکیٹ میں اس الیکٹرک ٹرک کی عوامی مانگ میں کمی دیکھی جا رہی تھی، اور سپیس ایکس کی جانب سے 10 کروڑ ڈالر سے زائد کی اس سرمایہ کاری نے ٹیسلا کی فروخت کے اعداد و شمار کو گرنے سے بچانے میں اہم کردار ادا کیا۔

رپورٹ میں انکشاف کیا گیا ہے کہ اگر سپیس ایکس یہ بڑی خریداری نہ کرتی تو چوتھی سہ ماہی کے دوران سائبر ٹرک کی رجسٹریشن میں 51 فیصد تک کی نمایاں کمی ریکارڈ کی جا سکتی تھی۔ اگرچہ ایلون مسک کی ایک کمپنی کا دوسری کمپنی کی مدد کرنا کاروباری حلقوں میں بحث کا موضوع بنا ہوا ہے، لیکن اس اقدام سے ٹیسلا کو اپنی سیلز کی کارکردگی مستحکم رکھنے میں عارضی طور پر بڑا سہارا ملا ہے